Moto ...

Titulli: Moto ... Sat Dec 08, 2007 4:39 am

Rosi: Po të largohesha, do të shkoja te Dukati!

Nuk ka humbur buzëqeshjen dhe pse përfundoi një tjetër sezon pa titull, një përjetësi kjo për një pilot të mësuar me suksese si ai. Por Valentino Rosi nuk e bën tragjike situatën e Jamahas, dhe pse kërkon nga ajo përmirësime të ndjeshme për 2008-n, përndryshe...

Atëherë Rosi, u mbyll një sezon i vështirë. Të bëjmë rezymenë: cili është sot Valentino?

Me siguri problemet e fundit (me teksat) më kanë pjekur. Nuk e kuptoja madhësinë e personazhit tim, tani situata është pak më e qartë. Ndihem një pilot që do të kërkojë të rregullojë gjithë gjërat për të garuar sa më i qetë me motorë.

Çfarë duhet flakur dhe çfarë duhet ruajtur nga ky sezon 2007?

Arrita fitore të bukura, dhe pse në fund më iku nga duart edhe vendi i dytë. Ndërsa problemet jashtë garave duhen flakur tej.

Ky Stoner është thjesht një meteor, apo një Valentino i ri?

Nuk është një meteor, por për të qenë një Valentino i ri duhet të fitojë sërish, duke luftuar ashpër me Valentinon dhe Pedrosën. Sido që të jetë nuk do të jetë Valentino i ri, do të jetë Stoneri.

Kejsit i erdhi keq që nuk mori komplimentat tuaj për fitoren.

Në Motegi ai kishte ndalur në të majtë për të marrë një flamur, unë kalova nga ana tjetër. Ishte një rastësi, nuk doja ta ofendoja. Heidënit, në 2007-n, i shtrëngova dorën, për këtë ka fotografi.

Sa dëshirë keni ta thyeni?

Shumë. Kam dëshirë të përballem me një kundërshtar të fortë, por më duhet që gomat dhe motori të funksionojnë mirë.

A keni pasur ndonjëherë makthin se nuk do të arrini të fitoni më?

E kanë të gjithë dhe unë jam shumë realist. Por kam arritur në përfundimin se jam ende në formë, por që nuk pata kushtet për të luftuar me Stonerin.

Ia dhatë fajin pak a shumë të gjithëve: sindroma Biaxhi?

As kjo nuk është e vërtetë. Unë them atë që ndodh në pistë, besoj në mënyrë objektive. Nëse duam një krahasim, pilotët e të kaluarës (Biaxhi) ankoheshin pa një përse të qartë, thonin se motori im ishte zyrtari. Pastaj shkova tek Jamaha dhe i munda gjithsesi. U ankova sepse kisha probleme reale. Sidoqoftë, nuk kam thënë kurë se Stoneri fitoi thjesht sepse pilotoi një Dukati.

Ku gaboi sivjet Mishleni?

Që sezonin e kaluar nuk arrija të pilotoja me këto goma, sepse kanë ndërmarrë rrugën që i kërkoi Honda. Sivjet, me rregullat e reja, nuk investuan aq para sa duhej për zhvillimin e gomave.

Gjëja me shqetësuese është që çdo përmirësim u hodh poshtë.

E saktë. Kjo do të thotë që diçka nuk shkon në repartin e motorëve. Jamaha nuk ka qenë kurrë motori më i shpejtë, por sivjet humbëm deri në 15-20 km/h në pjesët e drejta. Vuajtëm edhe reduktimin e benzinës: sa herë që tentuam që bënim diçka të re motori na u thye. Nëse duan të fitojnë duhet të bëjnë ndryshime të rëndësishme. Duhen njerëz më të aftë dhe më shumë para.

Atëherë të vazhdojmë me të ardhmen. Mishleni nuk ju lejoi të bënit testimet e para në Valencia dhe Malajzi. Një hakmarrje?

Nuk më lejuan të testoja sepse më kanë frikë. Mund t’i kuptoj.

Ishte e nevojshme gjithë kjo ashpërsi për të marrë Brixhstonin?

Unë u tregova i ashpër vetëm me Furusauan (shefi i Jamahas) dhe nuk kam folur kurrë me bosin e MotoGP, Ezpeleta.

Por, teknikisht, a është kjo ajo që ju duhet vërtet për t’u kthyer tek fitoret?

Gomat janë besim. Pas ngjarjeve të fundit dhe përgjigjeve që mora nga Mishleni nuk kisha më besim. Fatkeqsisht, me ta nuk e kupton kurrë se në cilën rrugë po shkon.

Po nëse nuk fitoni me Brixhstonin, çfarë do të ndodhë?

Nuk kërkoj justifikime, do të kem rastte të tjera.

A do të hiqnit dorë nga një titull në këmbim të atij të 2008-s?

Eshtë e rëndësishme që të rifilloj të fitoj sa më shpejt, por do ta kisha shumë bezdi të flakja tutje ata që kam fituar.

Doni një Jamaha menjëherë kompetitive: nëse nuk do të ndodhë në 2009-n do të jetë më e lehtë të shkoni te Dukati apo te Honda?

Duhet parë si do të përmirësohet ky djall motori. Nëse rritet mirë mund të pres edhe një vit. Nëse nuk mund të bëjmë asgjë, amen. Kam marrëdhënie të mira me të dy palët, por me siguri Dukati do të më pëlqente sepse është një skuadër italiane.

Por aty është Stoneri.

Nuk besoj se do të thoshte jo. Ndoshta i pëlqen të matet me mua me të njëjtin motor. Apo, mos ndoshta po ekzagjeroj pak...

Pikantet e Rosit
... për Dukatin

“Të gjitha skuadrat japoneze, Jamaha, Honda dhe të tjerat, sivjet e nënvlerësuan Dukatin. Dukati u tregua shumë inteligjente dhe agresive këtë sezon, duke shfrytëzuar shumë mirë rregullat e reja, dhe duke punuar më mirë se çdo skuadër tjetër. Ne ishim kompetitivë ndaj Hondës, por këta të fundit kanë shumë para dhe shumë njerëz dhe arrijnë të rikuperojnë në pak kohë, siç pamë në fund të vitit, ndërsa Jamahas kjo i mungon, prandaj na duhet shumë përgatitje”.

... për tifozët

“Pas probleme që pata këtë verë me teksat njerëzit filluan të kishin pak dyshim tek unë si njeri dhe kjo më mërzit pa masë, pasi nuk kam bërë asnjë gabim qëllimisht, siç pretendonin në atë kohë disa gazeta. Por tifozët e vërtetë më kanë mbështetur gjithnjë, sepse i njohin vlerat e mia në pistë dhe jashtë saj. Shpresoj vetëm që sezonin e ardhshëm të kem në dispozicion mjetet sa më të mira për t’u dhuruar atyre kënaqësitë që kërkojnë prej meje, fitoret”.

Titulli: Re: Moto ... Sat Dec 08, 2007 4:41 am

Rosi: Dua ta mbyll karrierën te Jamaha!

Testimet e Herezit ishin, në përgjithësi, pozitive, pasi ndjesia me Jamahan duket e rigjetur.
Fjalë të ëmbla ato të padronit japonez, Masao Furusaua, dhe përgjigja e Valentino Rosit është në të njëjtat valë.
“Dashuria” duket se ka rilindur dhe pasi u sistemua çështja e gomave, italiani është gati t’i premtojë bensikëri të përjetshme Jamahas.
“Më kanë trajtuar gjithnjë shumë mirë dhe kemi pasur një marrëdhënie fantastike”, u shpreh Rosi.
“Besoj se mund të qëndroj shumë gjatë këtu, sepse skuadrën e shoh shumë të motivuar”.
Pra, rinovimin e kontratës dhe, kësisoj, të besimit, skuadra japoneze duhet ta fitojë me punë.
“Jamaha ka kupptuar çfarë gabimesh ka bërë dhe tani po punon fort për t’i zgjidhur ato.
Ne po kërkojmë të ndërtojmë një moor kompetitiv dhe kështu mund të qëndrojmë bashkë, duke luftuar sërish për të fituar”, theksoi Rosi.
Por te Jamaha, Valentino do të ketë sivjet një rival më shumë, Horge Lorencon:
“Marrëdhënia ime me të është: “mirëmëngjes, mirëmbrëma”, por kjo nuk vlen vetëm për ne”, tha Rosi.
“Kështu ndodh edhe mes Heidënit dhe Pedrorës, Melandrit dhe Stonerit, pra me të gjithë shokëve të skuadrave.
Përveç kësaj, ne jemi të ndarë, pasi kemi dy llojë të ndryshme gomash, ndaj është e vështirë të shkëmbejmë mendime”.
Dhe në fund, edhe një bilanc për testimet e kryera në Spanjë: “Ishte ashtu siç e prisja.
Testimi i parë ishte pozitiv, pasi isha mjaft i shpejtë që në fillim”, përfundoi “Doktori”.
“Kam një marzh të madh përmirësimi, sepse mund ta përshtasim motorin me gomat e reja, megjithatë fjala kryesore në këtë çast është “punë”, vetëm punë”.