Qeveria miraton marrëveshjen për ekstradimet me Italinë

Qeveria miraton marrëveshjen për ekstradimet me Italinë
1/12/2007

Berisha: Jemi të gatshëm të nënshkruajmë marrëveshje të tilla me të gjitha vendet anëtare të BE-së dhe NATO-s

Këshilli Ministrave miratoi dje marrëveshjen e ekstradimit midis Shqipërisë dhe Italisë. Kjo marrëveshje pritet të nënshkruhet në datën 3 dhjetor gjatë vizitës së Kryeministrit italian Romano Prodi, në vendin tonë. Kryeministri shqiptar Sali Berisha, gjatë fjalës së mbajtur në mbledhjen e qeverisë, e cilësoi këtë marrëveshje të një rëndësie të veçantë, e cila sipas tij lehtëson luftën kundër kriminalitetit. “Kryefjala e kësaj mbledhjeje, është marrëveshja e ekstradimit me Italinë, që do të nënshkruhet gjatë vizitës së Kryeministrit italian Romano Prodi në Tiranë, një vizitë kjo jashtëzakonisht e rëndësishme për Shqipërinë. Kjo marrëveshje krijon lehtësira të mëdha në luftën e përbashkët kundër kriminalitetit”, u shpreh Berisha. Ai gjithashtu deklaroi se qeveria shqiptare është e gatshme të nënshkruajë një marrëveshje të tillë me të gjitha vendet anëtare të Bashkimit Evropian. “Qeveria shqiptare është e gatshme t’ua ofrojë të gjitha vendeve anëtare të BE-së dhe NATO-s, për të rritur në një nivel më të lartë shkallën e sigurisë kudo”, u shpreh kreu i qeverisë shqiptare.

Qëllimi

Marrëveshja ka si qëllim forcimin e bashkëpunimit juridik ndërmjet Republikës së Shqipërisë dhe Republikës së Italisë në lidhje me asistencën e ndërsjellët në çështjet penale, si dhe siguron ekstradimin e shtetasve respektivë dhe rregullon juridikisht transferimin e çështjeve penale. Realizimi i këtij bashkëpunim reciprok arrihet në disa forma, nëpërmjet shkëmbimit të informacionit, nëpërmjet lidhjes me dëshmitarët, nëpërmjet infiltrimeve, apo edhe skuadrave të përbashkëta hetimore. Po kështu, në bazë të kësaj marrëveshjeje shtetet në fjalë, Shqipëria dhe Italia, kanë të drejtë të shkëmbejnë persona që ndiqen penalisht në këto dy shtete. Kështu, shteti i interesuar i dërgon një kërkesë për ndihmë juridike shtetit palë në këtë marrëveshje. Pala që i kërkohet ndihma i jep zbatim sa më shpejt të jetë e mundur kërkesës për ndihmë juridike brenda kufijve të mundshëm dhe afateve procedurale. Secila palë kontraktuese u dërgon personave që ndodhen në territorin e palës tjetër aktet e procedimit të destinuara për to, nëpërmjet postës. Kërkesa juridike mund të kryhet edhe nëpërmjet autoriteteve gjyqësore që kanë kompetencë territoriale me qëllim të prezantimit të tyre. Këto kërkesa duhet të dërgohet në Itali në Ministrinë e Drejtësisë, në Drejtorinë e Përgjithshme të Drejtësisë Penale zyra II, ndërsa në Shqipëri duhet të dërgohen në Ministrinë e Drejtësisë, në Drejtorinë e Përgjithshme për Çështjet e Drejtësisë.

Shkëmbimi i informacioneve

Në bazë të kësaj marrëveshje, shteteve kontraktuese u lind e drejta që autoritetet gjyqësore kompetente të palëve mund të procedojnë për një shkëmbim informacioni pa paraqitur një kërkesë për këtë qëllim, në lidhje me vepra penale. Informacioni duhet të shkëmbehet në mënyrë të shkruar ose nëpërmjet çdo mjeti të aftë për të prodhuar një regjistrim të shkruar, në mënyrë që shtetet kontraktuese të verifikojnë vërtetësinë e informacionit. Autoriteti që siguron informacionin, në bazë të ligjeve të brendshme të shtetit palë, ka të drejtë t’i imponojë kushte autoritetit gjyqësor të marrjes së informacionit për përdorimin e tij. Midis autoriteteve gjyqësore kompetente për palën italiane, Drejtoria Kombëtare Antimafie procedon me shkëmbimin e informacioneve. Po kështu, palët në bazë të kësaj marrëveshjeje i mundësojnë njëri-tjetrit seanca pyetjesh me dëshmitarët nëpërmjet audiovizionit ose lidhjeve telefonike. Të gjitha këto bëhen në prani të një autoriteti gjyqësor dhe të një përkthyesi dhe shpenzimet mbulohen nga shteti që kërkon seancën. Për çdo rast të tillë mbahet procesverbal

» "Qeveria, e kapur nga korrupsioni"