Pas kërcënimeve, arrestohet lideri i Gardës së Car Lazarit

Vendosur: 1/12/2007

• Policia serbe ka arrestuar dje kreun e Gardës vetëvendosëse të Car Lazarit, pasi ndaloi një tubim të paligjshëm të tyre.

Garda kishte planifikuar një takim, menjëherë pasi u njoftua zyrtarisht se bisedimet për statusin e Kosovës dështuan dhe tashmë pritet shpallja e pavarësisë së Kosovës. Ata kanë kërcënuar me dhunë në rast se Kosova shkëputet nga Serbia. Por jo vetëm kaq, ata kanë kërcënuar edhe shërbimet sekrete dhe policinë e Beogradit se do të ekzekutohen në rast se nuk e mbrojnë Kosovën. Dhjetëra policë ishin të angazhuar në arrestimin e tyre. Ata kishin bllokuar rrugët hyrëse në manastirin mesjetar dhe kishën në Kurshumlije, objektet të cilat i dedikoheshin St. Nikola, ku rreth 20 anëtarë të Gardës kishin planifikuar të mbanin një tubim. Oficerët e policisë kanë arrestuar mes të tjerëve edhe Hadzhi Andrej Miliç dhe dy anëtarë të tjerë të kësaj garde, dhe ka parandaluar reporterët të mbërrinin në kishë. Miliç, i cili e prezanton veten si komandanti i këtij grupi, ka deklaruar më parë se ndjekësit e tij kishin në plan të merrnin pjesë në një ceremoni sllave në tempullin e Kishës Ortodokse Serbe. "Meqë situata është e qetë ne e kemi shtyrë marshin tonë drejt Merdares, po ashtu edhe formimin e zyrave tona qendrore të luftës". "Eshtë e pavend të krahasosh Ushtrinë Kombëtare Kosovare (ANA) dhe ne, pasi ANA është e armatosur, ndërsa ne nuk jemi. Ne kërkojmë vetëm që ushtria dhe policia jonë të mbrojnë Kosovën", tha Miliç. Deklarata e tij është në kundërshtim me kërcënimet e javës së kaluar se personeli i sigurimit në Serbi, përfshirë MUP dhe VS, do të ekzekutoheshin nga garda, nëse nuk i bashkoheshin këtij grupi në sulmin e programuar prej tij kundër shqiptarëve të Kosovës. Veç retorikave që nxisin dhunë, numri i saktë i personave të angazhuar në aksionet e kësaj garde dhe natyra e vërtetë e angazhimit të këtij grupi të errët janë të paqarta, por autoritetet thanë se nuk kanë potencial për të destabilizuar Serbinë. Garda e Car Lazarit është një grup paramilitar relativisht i ri i ndërtuar mbi konceptin e paraushtarakëve serbë që shkaktuan shumë dhunë gjatë luftërave të Jugosllavisë. UNMIK në Kosovë ka dhënë urdhër që anëtarët e kësaj bande nuk duhet të kalojnë kufirin me Kosovën.

Kërcënimi i fundit
Vetëm dy javë para përfundimit të bisedimeve, 10 dhjetorit, datë pas së cilës pritet që Kosova të deklarojë pavarësinë, grupi paramilitar serb, Garda e Car Lazarit, ka kërcënuar se do të deklarojë luftë në rast se Prishtina e hedh një hap të tillë. Ky nuk ishte kërcënimi i parë i gardës ushtarake. Grupi ka deklaruar protesta të dhunshme kundër pavarësisë së Kosovës në territorin e saj edhe më parë, por ato janë parandaluar nga policia e Kosovës, KFOR-i dhe UNMIK-u.