ARMADA TOSKA : Me Ermalin nuk shihemi vetem kur ai punon DJ

Është mjaft e zënë me punën, por kjo nuk e pengon të qëndrojë përgjatë gjithë kohës afër të fejuarit, për sa kohë punojnë bashkë. Amarda Toska, e njohur përzemërsisht nga publiku si Ami e “Portokallisë” në një intervistë për “Bluetooth” tregon gjithë angazhimet që ka aktualisht lidhur me punën, biznesin e hapur bashkë me Ermalin, një agjenci martesore për përkujdesjen për gjithë çiftet e reja që kurorëzojnë lidhjen e tyre në martesë si dhe jetën private: dashurinë dhe marrëdhëniet në çift.

Ka pak që ka nisur edicioni i rradhës së varietesë së humorit “Portokalli”. Sa e zënë është Amarda këto kohë, një ditë e zakonshme e jotja?
Dita nis më vonë për mua tani sepse nuk duhet të shkoj në shkollë. Paraditeve jam me provat në ‘Portokalli’, në drekë ditët që jam pa prova ose shfaqje shkoj në palestër dhe pasdite jam në agjencinë martesore që kemi hapur bashkë me Ermalin.

Cilat janë aktivitetet që ndjek gjatë ditës?
Zakonisht jemi të kufizuar në fundjavë për shkak të “Portokallisë” për të marrë pjesë në aktivitetet e ndryshme kulturore që mund të organizohen .Por duke qenë se bëjmë pjesë në botën e kulturës kemi ftesa të shpeshta për të ndjekur evenimente të ndryshme. Nuk mund të veçoj ndonjë në mënyrë specifike.

Ndalemi pak tek biznesi juaj, si po shkon ai?
Sigurisht ka vëmendjen tonë maksimale. Gjithë kohën dhe energjinë e mundshme ia kushtojmë të dy agjencisë martesore. Kemi bërë një investim goxha të madh dhe duhet më çdo kusht ta kurojmë me kujdesin më të madh, aq më tepër që bëhet fjalë për të ardhmen tonë.

Çfarë do iu këshillonit çifteve të reja, përsa u përket përgatitjeve për dasmën e tyre?
Ne u këshillojmë më të mirën e mundshme në varësi të buxhetit që kanë dhe bëjmë drejtimin artistik të ceremonisë së tyre duke i përfshirë gjithë çfarë duhet për një dasmë. Jo të gjitha çiftet kanë mundësi financiare për të patur të gjithë shërbimet që disponohen për një dasmë, që vërtet janë të shumta. Kështu, detyra jonë si agjenci është të ofrojmë variantin e shërbimeve që është më i përshtatshëm për buxhetin e tyre.

Sa kohë i kushton Ami shoqërisë?
T’ju them të drejtën nuk më mbetet shumë kohë për të kaluar me shoqërinë, sepse kuptohet që kur kam unë pushim, dikush tjetër ka punë. Por fatmirësisht puna në Top Channel na lidh me një grup të rinjsh me të cilët organizohemi shpesh.

Përmendët pak më lart se frekuentoni palestrën. Sa herë në javë shkoni?
Pas një pauze në sezonin e verës tani kam filluar të shkoj të paktën tre herë në javë.

Po jetën e natës?
Zakonisht pas shfaqjeve dalim më tepër për t’u shplodhur sesa për t’u ‘tërbuar’ sepse fundjava në ndryshim nga një pjesë e madhe e njerëzve, për ne është më e lodhshme.

Flasim pak për lidhjen tuaj me Ermalin, si po shkon ajo, sa kohë i kushtoni njëri-tjetrit?
Lidhja po shkon shumë mirë. Jemi shumë të lumtur pranë njëri-tjetrit. Sa kohë kalojmë bashkë? Ha-ha... gjithë ditën! Në prova jemi bashkë, drekën e hamë bashkë, pasdite kur kemi kohë dalim bashkë. Nuk jemi bashkë vetëm në ditët që Ermali është DJ në dasma.

Jetoni bashkë?
Jo, ende jo.

Fakti që punoni bashkë ju ndihmon më shumë?
Deri tani ky fakt ka shërbyer në të mirën tonë. Komunikojmë për çdo gjë me njëri-tjetrin. Jemi bashkë përgjatë gjithë ditës, kjo më duket një gjë shumë e mirë.

Cili nga ju është më tolerant?
Toleranca është një temë shumë e gjerë ndaj nuk di të jap një përcaktim të prerë. Të dy e njohim njëri-tjetrin dhe e kuptojmë se në ç’moment duhet të tolerojmë, une apo Ermali.

Ndonjë plan i afërt për martesë?
Realisht nuk kemi menduar akoma asgjë konkrete për martesë, por gjithsesi themi që dita e dasmës tonë do të jetë “A special event”!

Cilat janë vendet që frekuentoni kur jeni të lirë?
Shkojmë në Durrës. Kemi një shtëpi tonën atje. Na pëlqen të shkojmë shpesh, dhe sa herë mundemi kalojmë një ditë jashtë Tiranës pikërisht atje.

Të pëlqen të gatuash?
Shumë! Edhe kur jam e lodhur në darkë më pëlqen që t’i përgatis vetë gjërat. Ndihem më mirë kështu. Më pëlqen ta bëj një gjë të tillë.

Pjata jote e preferuar?
Nuk i them jo kurrë rizotos dhe ëmbëlsirave.

Veç të fejuarit cili është njeriu më i afërt për ty?
Pa dyshim, familja!

Surpriza më e bukur që ke marrë kohët e fundit?
Një celular që mua më kishte pëlqyer shumë.

Shprehja që përdor më shumë gjatë ditës?
Kohët e fundit disa batuta të Nasit.

» Vetem nje fjale ....
» Niveli i kredise i larte ,20 miliarde vetem ne 3 mujorin ...