Prinderit ne panik:"Larg mostren nga shkolla... "

Prindërit në panik: “Larg monstrën nga shkolla, përndryshe do të protestojmë”

Apeli i kreut të policisë të Beratit, Premçi, përkthehet si kërkesë për lirimin e vrasësit 13-vjeçar. Në Berat lirimi i minorenit perceptohet si një çështje ditësh...

BERAT – “I lëmë më mirë pa shkollë fëmijët, sesa t’i rrezikojmë duke i ulur në bankë me kriminelë të lindur”. Kështu i tha dje “Albania”-s i ati i një nxënëseje në shkollën "Shyqyri Lakra", në të cilën studionte dhe “monstra” 13-vjeçar që terrorizoi qytetin dhe gjithë Shqipërinë, pasi përdhunoi dhe vrau një grua në moshën e gjyshes së tij. Ankthi i prindërve ka ardhur pasi kreu i policisë lokale, Shemsi Premçi, ka kërkuar publikisht ndihmën e strukturave qeveritare për të gjetur një zgjidhje për 13-vjeçarin vrasës që shokoi qytetin. Duket se ky apel i Premçit i ka bindur qytetarët se “monstra” minoren do të jetë sërish një “gjahtar” i lirë në qytet. Më të shqetësuar janë prindërit e nxënësve të shkollës ku studionte 13-vjeçari R. H., ndërsa në qytet po shtohen dita-ditës zërat se ai do t’u kthehet bankave të shkollës. Në fakt, pas deklaratës publike të drejtorit Premçi, në radhët e prindërve është i evidentueshëm paniku dhe shqetësimi, ndonëse deklarata e kreut të policisë, fliste për ndryshimin e ambienteve dhe parametrave të izolimit të djaloshit dhe jo për ndonjë rikthim të mundshëm apo të menjëhershëm (sikurse po flitet) në jetën normale të komunitetit.
***********************************************************
Pështjellim
Apeli i Drejtorit të Policisë për të zgjidhur situatën ka krijuar pështjellim në radhët e qytetarëve, e sidomos të prindërve, edhe pse në fakt mesazhi i dhënë nga Premçi nuk kërkonte lirimin e djaloshit, por sistemimin e tij në respekt të moshës së mitur, në ambiente të izoluara. Por duket se kjo thirrje e tij, e pasuar më tej vetëm me heshtje dhe me mungesë të informacioneve lidhur me fatin e minorenit që përdhunoi dhe vrau, vetëm sa ka shtuar mjegullnajën lidhur me këtë çështje, duke i lënë vend “teorive” dhe thashethemnajës së përhapur se djaloshi do të lihet sërish i lirë. Një thashethemnajë, e cila duket se ka hedhur shtratin e saj në radhët e banorëve, aq sa në rrugicat e lagjes së djaloshit, nënat e moshatarëve të tij shfaqin hapur shqetësimin dhe indinjatën, duke e konsideruar vetëm një çështje orësh rikthimin e tij.
**********************************************************
Deklarata
Premçi, gjatë deklaratës së bërë në media, ka pohuar se 13-vjeçari nuk mund të mbahet më i izoluar dhe nën ruajtjen e policisë në ambientet e spitalit rajonal të qytetit, edhe pse është autor i disa veprave penale, pasi qëndrimi i tij në spital është një shkelje e të drejtave të njeriut, sepse fëmija-vrasës nuk merr asnjë mjekim që nga dita kur ai është sistemuar në një nga dhomat e sigurta të këtij spitali dhe mbajtja e tij në këtë mënyrë është një shkelje flagrante e ligjit. Ndërkohë që nga ana tjetër prindërit kanë theksuar se në lidhje me këtë problem duhet të reagojë edhe Drejtoria Arsimore Rajonale Berat, por edhe vetë drejtori i shkollës "Shyqyri Lakra", të cilët nuk duhet të lejojnë rikthimin e këtij monstre në shkollë, pasi në të kundërt, siç pohojnë vetë ata, jo vetëm që do t’i largojnë fëmijët nga kjo shkollë, por edhe do të protestojnë për izolimin e 13-vjeçarit R. H, që përveçse është një fëmijë me precedentë të rrezikshëm kriminalë, tashmë është shndërruar në një makth për të gjithë komunitetin.
**********************************************************
Rrëmbimi i të miturit, i dyshuari në paraburgim për 15 ditë

DURRËS – “Unë nuk kam gisht në rrëmbimin e 10-vjeçarit dhe po më mbani brenda pa asnjë fakt”. Kështu është mësuar të ketë thënë në gjyq 29-vjeçari Roland Sulejmani, i cili u arrestua nga policia të dielën e shkuar, me akuzën e rrëmbimit të një fëmije 10-vjeçar. Por gjykata ka vendosur që ai të qëndrojë 15 ditë në dhomat e paraburgimit, për t’i dhënë kohë hetuesve dhe policisë që të gjejë fakte për akuzën që ata kanë ngritur ndaj tij. Seanca gjyqësore për të përcaktuar masën e sigurisë ndaj Sulejmanit vetëm pak orë përpara se të skadonte afati?????????????????? prej 72 orësh që nga dita e arrestimit të tij. Akuza dhe policia nuk kanë pasur fakte, të cilat të mund të fajësojnë Roland Sulejmanin si autor të rrëmbimit dhe të lidhjes këmbë e duar të fëmijës 10-vjeçar me inicialet F.T., banues në Lagjen 14 në Shkozet të Durrësit. Në seancën e djeshme ai e ka mohuar të jetë ai autori i ngjarjes dhe ka deklaruar se mbahet brenda pa pasur asnjë fakt. Por, me gjithë mungesën e fakteve për ngjarjen e ditës së diel në Shkozet, kur fëmija 10-vjeçar u gjend i lidhur këmbë e duar dhe me gojë të mbyllur në një garazh të hapur, gjykata vendosi që Sulejmani të qëndrojë 15 ditë në gjendje arresti në dhomat e paraburgimit me akuzën e rrëmbimit dhe të heqjes së lirisë së përkohshme të 10-vjeçarit. Një masë e tillë është marrë për t’i dhënë kohë policisë dhe hetuesve që të sigurojnë fakte lidhur me dyshimet ndaj 29-vjeçarit. Ndërkohë, burime të cilat janë marrë me këtë ngjarje, e cila krijoi jo pak panik te prindërit e fëmijëve të mitur, kanë nisur të dyshojnë se kjo mund të jetë një ngjarje e paramenduar nga fëmijët e lagjes, për t’u bërë protagonistë dhe objekt mediatik.
**********************************************************
Dosje në Strasburg: “Policia më vrau vëllain”

KORÇË - Motra e një viktime dhune të policisë së Korçës do të kërkojë ndihmë në Gjykatën e Strasburgut për jetën e vëllait të saj, e shpërblyer me vetëm 4 milionë lekë nga gjykata e juglindjes. Drama e familjes Tahirllari, nisur disa vite më parë, kur njeriu i tyre është shoqëruar në policinë e Korçës për të mbërritur i vdekur në shtëpi nga dhuna, vazhdon me trauma prej 4 vjetësh. Kanë humbur të gjitha mundësitë tashmë dhe pas dënimit minimal të autorëve të ngjarjes, njëri prej të cilëve vazhdon të jetë i shpallur në kërkim, janë thyer sërish nga shkallët e gjyqësorit në Korçë, ku kanë marrë një dëmshpërblim një shumë krejt të papranueshme për ta. Mundësia e vetme e familjarëve të Gazmend Tahirllarit, banor i fshatit Goskovë, që ka mbyllur sytë prej 4 vjetësh, është Gjykata Strasburgut, ku të afërmit e viktimës janë duke grumbulluar dokumentacionin për ta nisur aty çështjen në fjalë. Vdekja e 37-vjeçarit ka qenë një nga rastet më të bujshme të ndodhura jo vetëm në rajonin juglindor, por në të gjithë vendin. Ngjarja ka pasur si fillesë një grindje të Gazmendit me të shoqen, Mirelën, e cila pas sherrit është larguar për në shtëpinë e prindërve të saj, në rrethin e Devollit. Pasi është larguar gruaja është ankuar në dyert e policisë, ndërsa kjo e fundit ka trokitur në derën e Gazmendit në fshatin Goskovë. Tahirllari, në gjendje të dehur, nuk u është bindur forcave të policisë për ta shoqëruar, ndaj është larguar për t’u kapur shumë shpejt nga këta të fundit. Forcërisht ai është futur në furgonin e policisë, ku gjatë transportit për në komisariat mbi të është ushtruar dhunë, gjë që ka çuar Tahirllarin në spital, ku pas disa orësh ka vdekur.

1 dhjetor 2007

» "Politika, larg reformes ne drejtesi"
» Prinderit : Po na largojne femijet nga qendra ...
» "New York Times ": Si hoqi Berisha qindra oficere
» Themelohet cmimi pagezuar "Niko Nikolla"