Lajme nga rajoni dhe bota

23.08.2007

PRISHTINË
Fillon sot vizitën disa ditore në Kosovë i dërguari i Bashkimit Evropian në treshen ndërmjetësuese për statusin, ambasadori Volfgang Ischinger.
Ischinger pritet të takohet me drejtuesit më të lartë vendorë e ndërkombëtarë në Prishtinë.Një ditë para vizitës për mediat britanike Ischinger ka deklaruar se ndarja e Kosovës nuk mbështetet nga Bashkimi Evropian.Ndërkaq zyrtarë evropianë kanë deklaruar se treshja nuk do propozojë zgjidhje, por do kërkojë nga palët të mendojnë dhe të dalin jashtë kornizave të tyre në mënyrë që të gjejnë një kompromis.

MOSKË
Rusia pranoi sot se arritja e kompromisit midis shqiptarëve dhe serbëve në rundin e ri të bisedimeve për statusin e Kosovës është “pabesueshmërisht e vështirë”. Komentet janë bërë nga i dërguari rus në bisedime Aleksander Harchenko. Rusia kundërshton vënien e afateve kohore për zgjidhjen e çështjes së Kosovës, ka shtuar Harchenko. “Nuk duhet vënë kornizë të fortë kohore. Sekretari i përgjitshëm i OKB-së e ka përcaktuar afatin e dorëzimit të raportit të treshës, e jo të negociatave” tha diplomati rus.

VJENË
Ministri austriak i mbrojtjes Norbert Darabosh e ka quajtur fatale idenë e ndarjes së Kosovës. Në një intervistë për Die Presse ai thotë se Austria vazhdon të besojë në një zgjidhje në Kombet e Bashkuara sa i përket cështjes së Kosovës.
Darabos ishte kritik për faktin se Serbia nuk ishte përfshirë mjaftueshëm në negociata.

PRAGË
Lideri i levizjes “Vetëvendosje” Albin Kurti ka deklaruar për gazetën amerikane “Uashington Post” se shqiptarët e Kosovës “duhet të fokusohen në pavarësi”.
“Gjëja më e keqe që ne mund ta bëjmë tash është t’i sulmojmë serbët” tha Albin Kurti dhe shtoi se “kjo vetëm do ti radikalizonte enklavat e tyre dhe do ti shkatërronte marrëdhëniet tona me ata”.

BAGDAD
Raportet nga Iraku thonë se të paktën 55 persona janë vrarë sot në sulme të ndara në jug dhe veri të vendit. Ushtria e Shteteve të Bashkuara njoftoi se një ushtarë amerikanë dhe katër irakianë janë vrarë gjatë 24 orëve të fundit në Bagdad.

UASHINGTON
Drejtuesit e Partisë Demokratike amerikane kanë kritikuar presidentin Bush për qëndrimet e tij lidhur me Irakun dhe krahasimin me Vietnamin nëse trupat amerikane largohen nga Iraku. Cdo tërheqje e forcave amerikane nga Iraku do forcojë terroristët dhe do sjellë vuajtje të civilëve ashtu sic ndodhi në Vietnam pas largimit të forcave amerikane, tha Bush duke folur para veteranëve në Kansas.
Senatori Harry Reid tha se strategjia e Bushit ka dështuar në ofrimin e një zgjidhje të nevojshme politike për stabilitetin e Irakut”.
Edhe senatori John Kerry kërkoi nga presidenti Bush të ndryshonte politikën në Irak.

NJU JORK
Gjeorgjia dhe Rusia kanë vazhduar me akuza të ndërsjellta pas deklaratave të Tbilisit se aeroplanë rusë kanë shkelur hapësirën ajrore të Gjeorgjisë dy herë gjatë këtij muaji.
Ambasadori i Gjeorgjisë në Kombet e Bashkuara ka akuzuar Moskën se po përdor fuqinë ushtarake ajrore për të destabilizuar një shtet demokratik. Rusia i ka hedhur poshtë akuzat.
Marrëdhëniet mes Rusisë dhe Gjeorgjisë kanë njohur vështirësi që kur në Gjeorgji ndodhi revolucioni i purpurtë, që largoi nga pushteti strukturat pro ruse.

LONDËR
Kryeministri britanik Gordon Broën diskutoi me homologen e tij gjermane Angela Merkel zhvillimet në Afganistan dhe kontributin e të dyja vendeve. Takimi u zhvillua derisa në Britani është kritikuar qëndrimi gjerman, për mospërfshirje aktive në veprimet ushtrake të trupave që veprojnë në kuadër të misionit të NATO-s atje.

PRISHTINË
Aktori i njohur dhe profesori Faruk Begolli ka vdekur dhe është varrosur sot në Prishtinë në moshën 63 vjeqare nga një sëmundje e gjatë dhe e rëndë. Begolli ka lindur në Pejë ndërkaq akademinë e teatrit e ka kryer në vitin 1966 në Beograd. Vitet e fundit ka punuar si profesor në fakultetin e arteve në Prishtinë. Faruk Begolli ka luajtur në mëse 70 filma dhe seriale televizive dhe konsiderohet si njëri ndër artistët më të njohur në Kosovë dhe më gjërë.
++++++++++++++++++++++++++++++++

PRAGË/BRATISLLAVË 26.05.2007
Në Bërno të Çekisë sot ka përfunduar samiti i presidentëve të vendeve të Evropës Juglindore, në të cilin u diskutua për statusin e Kosovës dhe për integrimet në bashkimin Evropian. Raportohet se mbizotëroi bindja se statusi i Kosovës duhet të zgjidhet ekskluzivisht nëpërmjet të rezolutës së Këshillit të Sigurimit të Kombeve të Bashkuara.
Sipas medive në Bratisllavë, presidenti, Ivan Gashparoviq ka thënë se Sllovakia “në asnjë mënyrë nuk do ta kundërshtoj vendimin kolektiv të Këshillit të Sigurimit për Kosovën”. Dje, ditën e parë të samitit, i cili është i mbyllur për media, presidenti i Çekisë, Vacllav Kllaus tha se “Çekia i mbështet negociatat e bëra nga Kombet e Bashkuara për statusin e Kosovës” dhe shtoi se “është e domosdoshme që të gjindet zgjidhje që do të pranohej nga popullata lokale”. KIEV
Më se 2 mijë trupa të Ministrisë së brendshme të Ukainës, lojale ndaj presidentit Viktor Yushchenko, janë dërguar në Kijev, ku presidenti Yushchenko dhe rivali i tij, kryeminsitri Viktor Janukovych po zhvillojnë bisedime krize. Ministri i brendshëm, Vasyl Tsushko tha sot se vendimi për vendosjen e traupave ishte marrë pa miratimin e tij:
- Nëse komanda e trupave të Ministrisë së brendshme e ka marrë përgjegjësinë dhe i ka lëvizur trupat atëherë ajo do të jetë përgjegjëse. Dëshiroj ta përsërisë edhe njëherë se nuk ka vendime nga unë.
Zartari i lartë i Këshillit të Sigurisë Kombëtare të Ukrainës, Ivan Plyushch, njëherësh aleat i presidentit Yushchenko, ka thënë se presidenti i ka dërguar trupat për ta ruajtur Zyrën e prokurorit të përgjithshëm dhe atë të Gjyqit Kushtetues, që janë institucionet kryesore nga të cilat varet zgjidhja e krizës politike. Kjo krizë u përshkallzua të premten kur presidenti Yushchenko urdhëroi që trupat e Mnistrisë së brendshme të vendosen nën komandën e tij. Bashkimi Evropian, Rusia dhe Shtetet e Bashkuara kanë shprehur shqetësim për mundësinë e përdorimit të forcës në këtë krizë. UASHINGTON


Presidenti amerikan, George Bush ka nënshkruar legjislacionin me të cilin parashihen fonde në shumë prej 100 miliardë dollarësh për luftërat në Irak dhe në Afganistan deri në fund të muajit shtator. Ky legjislacion ishte miratuar në Dhomën Përfaqësuese dhe në Senat, pasi shumica demokrate, që e kundërshton luftën, u tërhoqë nga përpjekja që në legjislacion të përfshihet edhe afati për tërheqjen e ushtarëve të Shteteve të Bashkuara nga Iraku.BAGDAD
Ushtria amerikane ka njoftuar se dy pjesëtarë të saj janë vrarë dje në Irak. Njëri është vrarë në provincën Diyala, ndërsa tjetri në një lagje të Bagdadit. Agjencitë e lajmeve raportojnë se prej invadimit të Irakut, në mars të vitit 2003, e deri tash janë vrarë 3440 ushtarë amerikanë.BEJRUT


Aeroplanat transportues me ndihma ushtarake nga Shtetet e Bashkuara dhe nga aleatët arabë kanë arritur në Bejrut të Libanit. Me këtë synohet të ndihmohen forcat libaneze në luftën e tyre kundër militantëve islamikë në një kamp të refugjatëve palestinezë në veri të Libanit. Në një zhvillim tjetër nga Libani, lideri i grupit militant shiit Hizballah, Sheikh Hassan Nasrallah ka ftuar për negociata për zgjidhjen e krizës, duke thënë se Libani po tërhiqet brenda luftës së udhëhequr nga Shtetet e Bashkuara kundër militantëve të inspiruar nga Al-Qaeda. SARAJEVË
Ish ushtari serb i Bosnjës, Radovan Stankoviq i dënuar për dhunim të grave të zëna myslimane gjatë luftës në Bosnjë, ka ikur nga burgu. Ai në nëntor të vitit të kaluar ishte dënuar me 16 vjet burgim për krime të luftës gjatë luftës në Bosnjë. Policia është vënë në kërkim të tij dhe i ka bllokuar rrugët në qytetin e Foça, ku Radovan Stankoviq po vuante dënimin me burg.
Lajme nga bota


UASHINGTON 24.05.2007
Zëdhënësi i Departamentit të Shtetit Tom Casey tha se është ende herët të flitet rreth njohjes eventuale të njëanshme të pavarësisë së Kosovës.
“Qëndrimi ynë nuk ka ndryshuar. Përkrahim planin e kryenegociatorit Martti Ahtisaari dhe e shfrytëzojmë si bazë për të shtyrë përpara procesin dhe pas një kohe të caktuar të zgjidhet çështja e Kosovës” tha Casey, në konferencën për shtyp.
Ai tha se në Këshillin e Sigurimit po vazhdon diskutimi dhe Uashingtoni beson se brenda Këshillit “mund të arrihet marrëveshje”.

PRAGË 24.05.2007
Presidentët nga 16 vende evropiane u takuan në Bërno për takimin e rregullt vjetor. Kosova është njëra ndër temat e takimit. “Rajoni, deri në njëfarë mase nuk është stabil dhe këtë duam ta trajtojmë” tha në prag të takimit, presidenti i Çekisë Vaclav Claus, duke iu referuar në veçanti Kosovës.
“Të krijosh vend të ri me popullsi të vogël dhe kufij të ri gjithnjë është detyrë e komplikuar. Por, status quo-ja është e patolerueshme” tha Claus, si nikoqir i takimit.
Takimi do të vazhdojë edhe nesër e pasnesër. Përveç të tjerëve marrin pjesë edhe presidentët: e Shqipërisë, Maqedonisë, Serbisë, Austrisë dhe Italisë.

ROMË 24.05.2007
Italia theksoi mbështetjen për pavarësinë e Kosovës.
“Ne mbështesim nevojën për njohjen e pavarësisë së Kosovës, një zgjidhje e cila për Serbinë mund të jetë e vështirë, por e cila aktualisht paraqet linjën përfundimtare në procesin historik që tashmë ka marrë fund” tha Ministri i Jashtëm Massimo D’Alema, njoftuan agjencitë e lajmeve.
Sipas agjencive, ai u ka thënë biznesmenëve shqiptarë në një konferencë për investime në Bari se “një vend i fortë dhe vital si Serbia duhet të drejtohet kah e ardhmja, pa mbetur e lidhur për idetë e të kaluarës”.

BRATISLAVË 24.05.2007
Ministri i Jashtëm i Sllovakisë Jan Kubish tha se negociatat e reja për Kosovën janë të kota dhe plani i krynegociatorit Martti Ahtisaari është baza e vetme për rezolutën e Këshillit të Sigurimit të Kombeve të Bashkuara. Për agjencinë sllovake të lajmeve SITA, ai paralajmëroi se Sllovakia në Këshillin e Sigurimit do të votojë “njësoj si vendet tjera të Bashkimit Evropian”.
“Palët nuk kanë qenë në gjendje të merren vesh deri tani dhe nuk vlerësojmë se kjo është e mundur as në të ardhmen” tha Kubish.

BRUKSEL 24.05.2007
Kryeministri i Shqipërisë Sali Berisha tha sot në Bruksel se nuk ka alternativë për planin e kryenegociatorit Martti Ahtisaari për statusin e Kosovës dhe Shqipëria e përkrah këtë plan me “besimin e plotë se ai mund të jetë marrëveshje për paqe të përhershme dhe stabilitet në Kosovë”.
Pas takimit me Komisionerin për Zgjerim të BE-së Olli Rehn, Berisha tha se “kjo është shumë e rëndësishme për Shqipërinë dhe fqinjët tjerë të Kosovës”.
Rehn ndërkaq, tha se Bashkimi Evropian pret që Këshilli i Sigurimit i KB të miratojë rezolutën dhe me këtë të shtrojë rrugën e zgjidhjes së qëndrueshme pa shtyrje të panevojshme”.

PARIS 24.05.2007
Ministri i Mbrojtjes i Francës Herve Morin do të zhvillojë në Kosovë udhëtimin e tij të parë jashtë vendit si ministër. Ai do të vizitojë trupat franceze në Kosovë, njoftoi Ministria. Të hënën, ai do të takohet me komandantin e KFOR-it Roland Kather, i cili në shtator do të kalojë komandën tek një gjeneral francez.
Rreth dy mijë trupa franceze janë duke shërbyer në kuadër të KFOR-it në Kosovë.

UASHINGTON 24.05.2007
Presidenti i Shteteve të Bashkuara George Bush tha se gjatë muajve të ardhshëm pret luftime të ashpëra dhe më shumë viktima në Irak.
“Kjo verë do të jetë kohë vendimtare për strategjinë e re. Pesë brigada shtesë do të arrijnë në Bagdad në mesin e qershorit. Sapo këto përforcime të fillojnë misionin e tyre, armiqtë e Irakut të lirë, përfshirë Al Kaidën dhe milicitë ilegale, do të vazhdojnë me bombat dhe vrasjet, në përpjekje për të na ndalur. Mund të presim më shumë viktima amerikane dhe irakiane” tha Bush, gjatë konferencës për shtyp në Shtëpinë e Bardhë.
Bush tha se ligjvënësit dhe ai do të votojnë për fonde urgjente për luftën në Irak, por Bagdadi duhet të “tregojë progres real” në luftimin e kryengritësve dhe pajtimin politik.
Presidenti amerikan foli edhe për programet bërthamore të Iranit dhe tha se do të punojë me aleatët e Shteteve të Bashkuara për ashpërsimin e sanksioneve ndaj Teheranit.
“Ne do të punojmë me partnerët tanë evropianë për sanksione të reja. Këtë çështje do ta diskutojë edhe me presidentin rus Putin ashtu si edhe me atë kinez Jintao. Ata duhet të kuptojnë se Irani me armë atomike do të ishte faktor destabilizimi në botë” tha Bush.

LUKSEMBURG 24.05.2007
Agjencia Ndërkombëtare për Energji Bërthamore tha se Irani me siguri është ndërmjet tre dhe tetë vite larg prodhimit të armëve atomike. Shefi i Agjencisë Mohamed El Baradei i bëri thirrje Iranit që të “dëgjoj bashkësinë ndërkombëtare”.
“Irani duhet të dëgjoj bashkësinë ndërkombëtare. Duhet të pezullojë aktivitetet për pasurimin e uraniumit si mjet i ndërtimit të besimit” tha El Baradei.
Ndërkohë, presidenti i Iranit Mahmoud Ahmadinejad tha se Teherani nuk do të ndalë “për asnjë moment” programin bërthamor.

NABLUS 24.05.2007
Trupat izraelite arrestuan në Rripin e Gazës më shumë se 30 zyrtarë të lartë të Hamasit, përfshirë Ministrin e Arsimit Nasser Shaer. Presidenti i Autoritetit Palestinez Mahmud Abbaz tha se arrestimet janë goditje për përpjekjet e paqes.
Shtetet e Bashkuara thanë se arrestimet kanë ngritur “shqetësimet”.
Shefi i diplomacisë së Bashkimit Evropian Havier Solana u takua sot në Gazë me Abbaz-in dhe u bëri thirrje palestinezëve dhe Izraelit që të ndalin dhunën.BEJRUT 24.05.2007
Kryemininistri i Libanit Fuad Siniora u zotua se qeveria e Libanit do të asgjësojë militantët islamikë që luftuan kundër ushtrisë në kampin e refugjatëve palestinezë. Këtë koment ai e bëri në fjalimin drejtuar kombit, pas disa ditësh të luftimeve të ashpëra ndërmjet ushtrisë dhe grupit Fatah al Islam, i lidhur me Al Kaidën, i cili kishte hyrë në kampin e refugjatëve në Bahr al Bared.

LUKSEMBURG 24.05.2007
Presidenti i Rusisë Vladimir Putin u bëri thirrje vendeve të Evropës Qëndrore dhe Lindore, anëtare të Bashkimit Evropian, që të “luajnë sipas rregullave” për të zbutur tensionet në rritje me Moskën.
“Në bashkëpunimin tonë ka probeme, por ne po provojmë t’i zgjidhim së bashku”, tha Putin gjatë vizitës së sotme në Luksemburg.

STRASBURG 24.05.2007
Ligjvënësit e Bashkimit Evropian përmes një deklarate vlerësuan se keqësimi i raporteve ndërmjet Rusisë dhe Estonisë mund të ndikojë edhe në raportet e Rusisë me BE-në. Në deklaratë u tha se autoritetet ruse kanë përdorur “retorikë armiqësore”.
Po sot, kryetari i Komisionit Evropian Hoze Manuel Barroso tha se embargoja e Rusisë ndaj importit të mishit nga Polonia është “diskriminuese”.MOSKË 24.05.2007
Ish presidenti sovjetik Mikhail Gorbachev kritikoi planet e Shteteve të Bashkuara për vendosjen e pjesëve të sistemit të mbrojtjes raketore në Evropë. Ai tha se sistemi mund të rrezikojë sigurinë ndërkombëtare dhe të rris garën për armatim.
Shtetet e Bashkuara planifikojnë që sistemi të vendoset në Çeki dhe në Poloni.KOMBET E BASHKUARA 24.05.2007
Ish Ministri i Jashtëm i Maqedonisë Srgjan Kerim është zgjedhur president i sesionit të 62-të të Asamblesë së Përgjithshme të Kombeve të Bashkuara. Ai ka qenë ambasador i Maqedonisë në KB në vitet 2001 deri në 2003. Sesioni i 62-të fillon në shtator.